Биһиги кулун тутар 14 күнүгэр Сунтаар улууһугар Элгээйи нэһилиэгэр барбыппыт. 6 кл. Сивцева Саша, Кырджагастырова Сахая, 8 кл. Тарагаева Чээнэ, Васильева Сахаайа, 9 кл. Николаева Сардаана, Максимова Саргы буолан сырыттыбыт. Олус үчүгэйдик көрүстүлэр, арыылаах алаадьынан айах туттулар. Бэлэхтээх папкалары туттардылар, манна саха харысхаллара—оҕолор оҥоһуктара, блокнот, ручка, буклет бааллара. Хомойуох иһин «Кэскил», «Юность Севера» хаһыат журналистара ыыппыт мастер-кылаастарын куоттаран кэлбиппит. Ол кэннэ регистрацияланан, аһыллыыга кыттан баран, эбиэт кэннэ Элгээйи Андреев аатынан айылҕа музейыгар ыалдьыттаатыбыт. Музейга Саха сирин дьикти айылҕата, Аан дойду кыыллара, харамайдара, муора түгэҕин олохтоохторо, айылҕата бааллар. Кэнтиктэн кэлбит биир экспонаты булбуппут—ол ыт уонна бөрө оҕото кыыл этэ. Манны биһиги Кэнтикпит энтузиаст учуутала, музей төрүттээччитэ Филиппов Николай Никитич ыыппыт эбит. Үөһээ Бүлүүттэн биһигини кытта Ороһу, Үөһээ Бүлүү №2 оскуолалара бааллара, барыта 19 этибит.
Дискотекаҕа флеш-моб үөрэппиттэрэ, араас оонньуулары ыыппыттара, олус элбэх оҕолору кытта билистибит. Иккис күнүгэр «Мистер Юнкор» үрдүк аатын ылан Ороһу оскуолатын 11 кылааһын үөрэнээччитэ Ласточкин Гриша улууспутун аатырта уонна эһиилги слет Ороһуга буолар буолла. Түмүк иннинэ Элгээйи оскуолатын оҕолорун концерын олус астына көрдүбүт. Манна Россияҕа, Аан дойдуга аатырбыт «Домисольки» бөлөх баара. Уопсай түмүгүнэн биһиги пресс-кииммит «Лучший пресс-центр Вилюйского региона» күрэххэ 2 миэстэни ылан дипломунан, кубогынан наҕараадаланна.
Бу айаммытыгар оскуола директора Астанова Ольга Васильевна проезпыт анаарын төлөөн, сухой паек ас биэрэн ыыталаан, олус көмөлөстө, өйөөтө. Сивцева Саша, 6 кл. |
